„ნაციონალური მოძრაობა“ ქუთაისში საუბნო საარჩევნო კომისიის წევრობაზე კენჭისყრაზე უარს ამბობს. პარტიის წარმომადგენელმა გიორგი უკლებამ სპეციალურ ბრიფინგზე სიები წარმოადგინა და განაცხადა, რომ კომისიები „ქართული ოცნებით“ კომპლექტდება და მათი ვინაობა წინასწარ არის ცნობილი.

„საოლქო საარჩევნო კომისია არ რეაგირებდა იმ ფაქტებზე, როდესაც კანდიდატურების წარდგენა პირდაპირ „ოცნების“ შტაბებიდან და გამგეობებიდან ხდებოდა. ჩვენი არაერთი შუამდგომლობის მიუხედავად, რომ მომხდარიყო კანდიდატურების დაბარება და მათთან გასაუბრება არც ერთი შუამდგომლობა არ დაკმაყოფილდა.

არც ერთი კანდიდატი, რომელიც წინა არჩევნების დროს დისციპლინური დევნის სუბიექტი იყო და დარღვევები უფიქსირდებოდა, არ მოხსნილა კონკურსიდან. წინასწარ არის ცნობილი ვის აირჩევენ კომისიის წევრებად",-განმარტა პირველ არხთან გიორგი უკლებამ.

ცესკოში წერილობით განმარტავენ, რომ კომისიის წევრებს კანონის შესაბამისად უფლება აქვთ არ მიიღონ მონაწილეობა საუბნო–საარჩევნო კომისიის წევრების არჩევის პროცედურაში.

აღნიშნულთან დაკავშირებით, პროცედურების დასრულების შემდეგ, 59–ე საოლქო საარჩევნო კომისია კომენტარს ხვალ, 12:00 საათზე გააკეთებს.