ქობულეთში, სოფელ ცეცხლაურის მცხოვრებლებმა აქცია გამართეს.

პროტესტი მოცვის მეურნეობაში დასაქმებულებმა დაგვიანებული ანაზღაურების გამო გამოთქვეს. აქციის მონაწილეები ამბობენ, რომ ხელფასები ერთ თვის წინ უნდა აეღოთ, მიუხედავად დაპირებისა დამსაქმებელი მათ გაცემას აგვიანებს.

მათი განცხადებით, მეურნეობაში დასაქმებული იყო 150 ადამიანი, თითოეულს კი 300-დან 500 ლარამდე ანაზღაურება აქვს მისაღები.

„თვენახევარი ვიმუშავე, 300 ლარი მაქვს ასაღები, ბევრს 500. ვითხოვთ ხელფასს, გვატყუებენ მოგცემთო, ოჯახებით ვმუშაობთ მცირე ანაზღაურებაზე და იმასაც არ გვაძლევენ. თუ კიდე დიდხანს დაგვიანდა ხელფასების გაცემა, პროტესტს გავაგრძელებთ", - აცხადებს აქციის მონაწილე ნაზი მახარაძე

დამსაქმებელ კომპანიაში აცხადებენ, რომ ხელფასების დაგვიანების მიზეზი ფინანსური პრობლემები გახდა და ანაზღაურების გაცემას სამშაბათიდან დაიწყებენ.