ლარის კურსი დღესაც გაუფასურდა. ბოლო ორ კვირაში ეროვნული ვალუტის კურსმა დღეს ყველაზე დიდი ვარდნა განიცადა და ოთხი თეთრით დაეცა. ხვალ ერთი დოლარის ოფიციალური ფასი ორი ლარი და 49 თეთრი იქნება.
სავალუტო ჯიხურებში კი დოლარი ორ ლარად და 50 თეთრად იყიდება. რაც შეეხება ევროს, მასთან მიმართებაში ეროვნული ვალუტის კურსი ორ ლარსა და 97 თეთრს შეადგენს.
ჯერ უცნობია, მოახდენს თუ არა ეროვნული ბანკი გაუფასურების ტენდენციის შესაჩერებლად მორიგ ინტერვენციას. ხვალ მონეტარული კომიტეტის სხდომაა დანიშნული, სადაც უნდა გადაწყდეს, შეიცვლება თუ არა რეფინანსირების განაკვეთი, რამაც კურსზე გავლენა უნდა მოახდინოს.
ხვალვე ეროვნული ბანკი ეკონომიკაში არსებულ ვითარებასა და პროგნოზზე განცხადებასაც გაავრცელებს.
რა არის ბოლო ორკვირიანი გაუფასურების მიზეზი და რამ განაპირობა დოლარზე მოთხოვნის მკვეთრი ზრდა-მთავრობის ეკონომიკური გუნდიდან ოფიციალური განცხადება ჯერ არ გაკეთებულა.