უკრაინა რუსეთის მიერ დონბასში გაერო-ს მისიის გაგზავნის შესახებ წარდგენილ პროექტს აკრიტიკებს. როგორც გაერო-ში უკრაინის მუდმივმა წარმომადგენელმა, ვლადიმირ ელჩენკომ უკრაინულ ტელეარხ 112-ს უთხრა, რუსეთის პროექტს გაერო-ს სამშვიდობო მისიის უკრაინაში გაგზავნასთან საერთო არაფერი აქვს. ელჩენკოს თქმით, პროექტში სრულიად არარეალური მიზნებია დასახული.

„პირველ რიგში, პროექტში საუბარია არა გაერო-ს სამშვიდობო მისიაზე, არამედ მისიაზე, რომლის წევრებმაც უნდა დაიცვან ეუთო-ს მეთვალყურეები. ანუ წარმოიდგინეთ სიტუაცია, დგანან ეუთო-ს მეთვალყურეები და მათ იცავენ გაერო-ს მშვიდობისმყოფელები. მე ვერ წარმომიდგენია როგორ შეიძლება ეს ტექნიკურად მოხერხდეს“, - განაცხადა ელჩენკომ.

მისივე თქმით, პროექტში ნათქვამია, რომ გაერო-ს მისიის წევრები ე.წ. გამყოფი ხაზის გასწვრივ იქნებიან დისლოცირებულები და საუბარი არ არის უკრაინა-რუსეთის საზღვარზე.

„ჩვენ მოვითხოვთ, რომ ნებისმიერი მისია განლაგდეს უკრაინისა და რუსეთის საზღვარზე, რათა დავუბრუნდეთ 2014 წლამდე არსებულ მდგომარეობას“, - განაცხადა გაერო-ში უკრაინის ელჩმა.

რუსეთმა გაერო-ს უშიშროების საბჭოს წევრებს დონბასში გაერო-ს მშვიდობისმყოფელების გაგზავნის შესახებ პროექტი გუშინ წარუდგინა.