უკრაინის ყოფილი პრეზიდენტი ვიქტორ იუშენკო მიხეილ სააკაშვილის ირგვლივ განვითარებულ მოვლენებს ეხმაურება.
საზოგადოებრივმა მუწყებელმა იუშენკო პოლონეთში ექსკლუზიურად ჩაწერა. „მოამბემ” უკრაინის ყოფილ პრეზიდენტს მიხეილ სააკაშვილისთვის უკრაინის მოქალაქეობის ჩამორთმევის შეფასება სთხოვა.
უკრაინის ყოფილი პრეზიდენტი მომხდართან დაკავშირებით მწუხარებას გამოთქვამს. მისივე თქმით, რთულია აღნიშნულ თემაზე კომენტარის გაკეთება, რადგან ეს უსიამოვნო და დელიკატური საკითხია.
უკრაინის ყოფილმა პრეზიდენტმა ისიც აღნიშნა, რომ სააკაშვილთან ურთიერთობებში მისთვის არაფერი შეცვლილა და უკრაინაში ყოფნის პერიოდში საქართველოს ყოფილი პრეზიდენტი მისი ხშირი სტუმარი იყო.
იუშენკომ ასევე რუსეთის საგარეო პოლიტიკაზეც ისაუბრა და განაცხადა, რომ რუსული საფრთხე თანაბრად საშიშია როგორც საქართველოსა და უკრაინისთვის, ასევე ევროპის სხვა სახელმწიფოებისთვის.
ვიქტორ იუშენკო აცხადებს, რომ აღნიშნული პრობლემის მოუგვარებლობაზე პასუხისმგებლობა ბრიუსელსა და რუსეთის მეზობელ ქვეყნებს ეკისრებათ.
უკრაინის ყოფილმა პრეზიდენტმა საქართველოსა და უკრაინის ევროინტეგრაციის პროცესთან დაკავშირებით დასმულ კითხვებსაც უპასუხა და განაცხადა, რომ უკრაინა საქართველოში მიმდინარე მოვლენებს ყურადღებით აკვირდება.