ვაზაგაშვილების ოჯახის ადვოკატი მთავარ პროკურატურას მიმართავს. გამოძიების დაწყების მოთხოვნით, გაგი მოსიაშვილმა დღეს ირაკლი შოთაძის უწყებაში აუდიოჩანაწერი მიიტანა.
ადვოკატის მტკიცებით, ე.წ კორტების სპეცოპერაციის საქმეზე სახელმწიფო ბრალდების ერთ-ერთი მთავარი მოწმე ზეწოლაზე საუბრობს.
ვაზაგაშვილების უფლებადამცველის ინფორმაციით, მოწმე ამბობს, რომ ერთ-ერთი მსჯავრდებულის ოჯახის წევრები ემუქრებიან და სასამართლოზე მიცემული ჩვენების შეცვლას სთხოვენ. ადვოკატი არც მოწმის და არც მსჯავრდებულის ვინაობას ასახელებს. ჩანაწერს კი იმ შემთხვევაში გაასაჯაროებს, თუკი მთავარი პროკურატურა საქმით არ დაინტერესდება.
ე. წ კორტების სპეცოპერაციის საქმეზე შსს-ს ყოფილი მაღალჩინოსნები ირაკლი ფირცხალავა, გიორგი ცააძე, კახაბერ ნაკანი, ლევან ბეროძე და გრიგოლ კვინიკაძე არიან მსჯავრდებულები.