შეუშვებენ თუ არა მიხეილ სააკაშვილს პოლონეთიდან უკრაინაში - უკრაინის საგარეო საქმეთა მინისტრი „მოამბის“ შეკითხვას პასუხობს.
პავლო კლიმკინის განცხადებით, მისი ქვეყანა სამართლებრივ გადაწყვტილებას მიიღებს. კონკრეტულად კი, ქვეყანაში მიხეილ სააკაშვილის შეშვების საკითხი მესაზღვრეების გადასაწყვეტია. ექსტრადიციის თემასთან დაკავშირებით, საქმეში, აუცილებლობის შემთხვევაში, შესაბამისი უწყებები ჩაერთვებიან.
უკრაინის საგარეო საქმეთა მინისტრის განცხადებით, არ აქვს მნიშვნელობა, პირი რომელი პოლიტიკური ველის მოთამაშეა. კლიმკინი ხაზს უსვამს, რომ მთავარია კანონის უზენაესობა.
პოლონეთი-უკრაინის საზღვრის „კრაკოვეცის“ გამშვებ პუნქტზე კი, რომლის გავლითაც 10 სექტემბერს მიხეილ სააკაშვილი უკრაინაში აპირებს დაბრუნებას, მავთულხლართები გააბეს. ამის შესახებ ინფორმაციას „რადიო თავისუფლება“ ავრცელებს.
„რადიო თავისუფლება“ წერს, რომ რამდენიმე დღის წინ „კრაკოვეცის“ გამშვებ პუნქტზე მავთულხლართები გააბეს შესასვლელი ზონის გასწვრივ. უკრაინელი მესაზღვრეები უარს ამბობენ კომენტარის გაკეთებაზე.