თარიღი უცვლელია - მიხეილ სააკაშვილი 10 სექტემბერს უკრაინაში მაინც ჩადის. დაანონსებული გეგმის მიხედვით, ამ დროისთვის პოლონეთში მყოფი ოდესის ყოფილი გუბერნატორი ქვეყანაში შესვლას კორჩოვა-კრაკოვიეცის სასაზღვრო პუნქტიდან აპირებს.
საზღვარზე სააკაშვილს საკუთარი პოლიტიკური მხარდამჭერები დახვდებიან, რომლებიც ერთი დღით ადრე ქალაქ ლვოვში მხარდამჭერ აქციას გამართავენ.
ისევ პასუხგაუცემელია კითხვა - მისცემენ თუ არა უკრაინის საზღვრის გადაკვეთის უფლებას პეტრე პოროშენკოს ყოფილ მრჩეველს, რომელსაც უკრაინის მოქალაქეობა თვეზე მეტია ჩამორთმეული აქვს.
ასევე, გაურკვეველია, ქვეყანაში შეშვების შემთხვევაში, დააკმაყოფილებს თუ არა კიევი ოფიციალური თბილისის მოთხოვნას საქართველოს ექსპრეზიდენტის დაკავება-ექსტრადირებაზე.
,,მოამბის” კითხვაზე უკრაინის პირველი დიპლომატი ამბობს, რომ საჭიროა სამართლებრივი პროცედურის და კანონის უზენაესობის დაცვა.
„მოამბის“ გადამღები ჯგუფი ლვოვშია - მარიამ მენაბდე დეტალებით.