კიევის ცენტრში დანაღმული ავტომობილის აფეთქებას ჩეჩნური წარმოშობის საქართველოს მოქალაქე თემურ მახაური ემსხვერპლა. ის ასევე ცნობილი იყო ალი ტიმაევისა და რუსლან პაპასკირის სახელითაც.
გავრცელებული ინფორმაციით, მახაური ავტომობილში, ქალთან და მცირეწლოვან ბიჭთან ერთად იმყოფებოდა. შემთხვევის შედეგად მძიმე დაზიანებები მიიღო ქალმა, მცირეწლოვანს კი მსუბუქი დამწვრობები აღენიშნება.
უკრაინული სააგენტო “ცენზორის” ინფორმაციით, თემურ მახაური საქართველოს შინაგან საქმეთა მინისტრის ყოფილი მოადგილის და შემდეგ უკრაინაში ოდესის პოლიციის ყოფილი ჩინოსნის გიორგი ლორთქიფანიძის პირადი მეგობარი და ქართული სპეცსამსახურების თანამშრომელი იყო.
სტატიაში აღნიშნულია, რომ მახაური თურქეთში მცხოვრები ჩეჩნური თემის საქმეებში აქტიურად იყო ჩართული და რუსეთის აგენტურის შესახებ ფლობდა ინფორმაციას. შესაბამისად, რუსეთის სპეცსამსახურებისთვის ის არასასურველი ფიგურა იყო.
რუსული გამოცემა „კომერსანტის“ ცნობით თემურ მახაური, იგივე რუსლან პაპასკირი 2012 წელს ლოპოტას ხეობაში ჩატარებული სპეცოპერაციის მონაწილეც იყო.
მახაურის ლაფანყურის სპეცოპერაციასთან კავშირზე საუბრობს ქართველი ექსპერტი მამუკა არეშიძეც, რომელიც ამბობს, რომ ერთ-ერთი ვერსიით, ის რუსეთის სპეცსამსახურების თანამშრომელი იყო.
მისივე თქმით, ლოპოტას ჩაშლილი სპეცოპერაციის შემდეგ რამდენიმე ადამიანი ქართველმა სპეცსამსახურებმა თურქეთის საზღვარზე გადააცილეს და, ერთ-ერთი ვერსიით, მათ შორის იყო თემურ მახაური.