დღეს, გვიან ღამით, საქართველოს ფუტსალის ნაკრები რუმინეთში გაემგზავრება. გუნდს თავისი არსებობის ისტორიაში პირველად გაუჩნდა ევროპის ჩემპიონატზე მოხვედრის რეალური შანსი, რომელიც 2018 წელს სლოვენიაში გაიმართება.

ავთანდილ ასათიანის გაწვრთნილები ევროპის ჩემპიონატის პლეიოფში რუმინეთს 12 სექტემბერს ესტუმრებიან, 26 სექტემბერს კი თბილისში უმასპინძლებენ.

რუმინეთთან პირველ მატჩს გუნდის სამი წამყვანი წევრი გამოტოვებს: ძირითადი მეკარე და კაპიტანი ზვიად კუპატაძე ტრავმირებულია, გუნდის ბომბარდირს, არჩილ სეფისკვერაძესა და შოთა ჭანუყვაძეს კი 1-მატჩიანი დისკვალიფიკაცია აქვთ.

"გული მწყდება, რომ ასეთი მნიშვნელოვანი მატჩის წინ დავშავდი. სხვა რა გზაა, ეს ერთი შეხვედრა უნდა გამოვტოვო და 26 ივნისის თამაშს დაველოდო. ნაადრევად მოედანზე გასვლა უფრო საშიში იყო. იყო საფრთხე, რომ კუნთი გამეწყვიტა. მაგრამ ისეთი გუნდი ჩამოყალიბდა და ისეთი მეკარეები გვყავს, მჯერა, რუმინეთში კარგად ითამაშებენ. 26 სექტემბრამდე კი სრულად უნდა მოვმჯობინდე და იმედია, გუნდს დავეხმარები" - ამბობს ზვიად კუპატაძე პირველ არხთან საუბარში.

კუპატაძის არყოფნაში, ნაკრებს რუმინეთში ორი მეკარე ეყოლება - ალექსანდრე ჯამბურია (ტატიშვილი, თბილისი) და თორნიკე ბუკია (სპარტაკი, მოსკოვი).