ხელვაჩაურში, ახალსოფელში ჯილეხის, ანუ ციმბირული წყლულის გავრცელების საშიშროება არ არსებობს. ამის შესახებ სურსათის ეროვნული სააგენტოს ვეტერინარიის დეპარტამენტში განაცხადეს. უწყებაში ამბობენ, რომ ყველა აუცილებელი პრევენციული ზომა გატარებულია, მიმდინარეობს შინაური ცხოველების ვაქცინაცია, დამუშავდა ნიადაგი, რომელზეც დაავადებულ ცხოველს ჰქონდა შეხება.
„ჩავატარეთ ყველა საჭირო ღონისძიება, რაც ითვალისწინებს ცხოველების ვაქცინაციას, დეზინფექციას, დამუშავდა ყველა ის ადგილი, სადაც აღმოჩნდა დაავადებული ცხოველი, სადაც მოხდა, ტყავისა და სხვა ნარჩენების გადაყრა. დღეისათვის ვაქცინაცია ისევ მიმდინარეობს, სპეციალისტები სოფელს რამდენჯერმე გადაამოწმებენ და შეგვიძლია ვივარაუდოთ, რომ დაავადების გავრცელების საშიშროება, როგორც ცხოველებში, ასევე ადამიანებში, ამ ეტაპზე არ არსებობს“,- განაცხადა სურსათის ეროვნული სააგენტოს ვეტერინარიის დეპარტამენტის ხელმძღვანელმა ლაშა ავალიანმა.
ჯილეხის შემთხვევა ახალსოფელში აგვისტოს ბოლოს დადასტურდა. ერთი მოქალაქე, რომელსაც დაავადებული ცხოველის ხორცთან ჰქონდა შეხება, 28 აგვისტოს გარდაიცვალა. აჭარის საზოგადოებრივი ჯანდაცვის ცენტრში აცხადებენ, რომ გარდაცვალების მიზეზი მედიკოსებისადმი დაგვიანებული მიმართვა გახდა.
ცენტრმა შეამოწმა ყველა იმ პირის ჯანმრთელობის მდგომარეობა, რომლებიც დაავადებული ხორცის დამუშავებაში მონაწილეობდნენ, თუმცა მათ საეჭვო არაფერი აღმოაჩნდათ.
ორი დღის წინ ახალსოფელში კიდევ ერთი ცხოველის დაღუპვის ფაქტი დაფიქსირდა, თუმცა იყო თუ არა ამის მიზეზი ციმბირული წყლული, ლაბორატორიული კვლევის შედეგად დადგინდება. შემთხვევის ადგილი დამუშავდა, თუმცა მხოლოდ ნაწილობრივ შემოისაზღვრა და მასში შინაური ცხოველები ისევ აღწევენ. სოფლის გამგებელი აცხადებს, რომ საეჭვო ტერიტორიის იზოლაციას დიდი ფართობის გამო რამდენიმე დღე დასჭირდება.