ე.წ. კორტების საქმის მთავარი მოწმე აცხადებს, რომ ამავე საქმეში მსჯავრდებული ირაკლი ფირცხალავას ოჯახის წევრებმა მასზე ზეწოლა განახორციელეს.
მოწმე კობა გოგატიშვილის თქმით, თავდაპირველად მუქარის შემცველი მოკლე ტექსტური შეტყობინებები გაუგზავნეს, მოგვიანებით კი იძულებული გახდა ფირცხალავას მეუღლესა და შვილს მათსავე მანქანაში შეხვედროდა. სადაც ნინო ხვიტიამ, სასამართლოში მიცემული ჩვენების შეცვლის სანაცვლოდ, 30 ათასი დოლარი შესთავაზა. ირაკლი ფირცხალავას შვილი კი ამ შეთავაზებაზე უარის თქმის შემთხვევაში, ფიზიკური განადგურებით დაემუქრა.
გოგოტიშვილი ამბობს, რომ მას წინასწარ მოფიქრებული ვერსია დააზეპირებინეს და ამ ვერსიის სახალხო დამცველისთვის მოყოლა მოსთხოვეს.
გოგატიშვილს უნდა ეთქვა, რომ კორტების სპეცოპერაციის ადგილზე გვიან მივიდა და არაფერი უნახავს, ხოლო სასამართლოს ჩვენება პროკურორების ზეწოლით მისცა.
თავად ნინო ხვიტია ბრალდებებს უარყოფს და აცხადებს რომ მას მისი და გოგატიშვილის შეხვედრის სრული ჩანაწერი აქვს, რომელსაც სამართალდამცველებს წარუდგენს.
ხვიტიას თქმით გოგატიშვილი თავად დაუკავშირდა და ინფორმაციის მიწოდება შესთავაზა.