ინვესტიციების კლებისა და დაბალი ეკონომიკური ზრდის მიზეზი ხელისუფლების არასწორი ეკონომიკური პოლიტიკაა,- ასე შეაფასა „ევროპული საქართველოს“ წევრმა ზურაბ ჭიაბერაშვილმა „საქსტატის“ მიერ ორი დღის წინ გამოქვეყნებული კვლევა.

ჭიაბერაშვილის თქმით, კვლევაში განსაკუთრებით თვალშისაცემია ინვესტიციების კლება ენერგეტიკის სფეროში იმ ფონზე, როდესაც გაზის ტარიფი საქართველოს ქალაქებისა და რაიონების დიდ ნაწილში 11,12,13 თეთრით, ზოგან კი 16 თეთრით გაიზარდა.

მისივე თქმით, ელექტროენერგიის ტარიფის გაზრდა მოსალოდნელია.

„საგანგაშოა, რომ ფასების ზრდამ 2017 წლის აგვისტოში, წინა წლის აგვისტოსთან შედარებით, 5.7% შეადგინა.ფასების საგრძნობი ზრდა დაფიქსირდა პრაქტიკულად ყველაფერზე, რასაც სასურსათო მაღაზიაში ჩვენი მოქალაქეები ყიდულობენ. ასევე გაძვირდა ჯანმრთელობის დაცვა",-განაცხადა ჭიაბერაშვილმა.

„ევროპული საქართველოს“ წევრი გამოსავალს მცირე და საშუალო ბიზნესის მხარდაჭერის პროგრამას მიიჩნევს, რომელიც გადასახადების შემცირების გზით ეკონომიკური ზრდის დაჩქარებაზე, ფასების დასტაბილურებასა და უმუშევრობის შემცირებაზეა ორიენტირებული.