11 სექტემბრის ტერაქტებიდან 16 წელი გავიდა.

დღეს ამერიკის შეერთებულ შტატებში თავდასხმების შედეგად დაღუპულებს იხსენებენ.

ტრადიციულად, სამგლოვიარო ღონისძიება გაიმართება ნიუ-იორკში, 11 სექტემბრის მემორიალთან. ცერემონიის დროს დაღუპულებს ექვსჯერ მიაგებენ პატივს წუთიერი დუმილით და ხმამაღლა წაიკითხავენ ტერაქტების დროს დაღუპულების სახელებს.

ღამით იმ ადგილას, სადაც მსოფლიო სავაჭრო ცენტრის ცათამბჯენები იდგა, ორი ცისფერი ინსტალაცია განათდება. სხივები, რომლებიც ტყუპი ცათამბჯენების სიმბოლოა, ცაში 6,5 კილომეტრის სიმაღლეზე აიჭრება.

2001 წლის 11 სექტემბერს „ალ-ქაიდას“ 19-მა ტერორისტმა ოთხი სამგზავრო თვითმფრინავი გაიტაცეს. ორი მათგანი მსოფლიო სავაჭრო ცენტრის ცათამბჯენებს შეეჯახა, რის შედეგადაც ორივე შენობა ჩამოინგრა. მესამე თვითმფრინავი პენტაგონის შენობას შეეჯახა, მეოთხე ავიალაინერი, რომელიც ვაშინგტონისკენ მიემართებოდა, პენსილვანიის შტატში ქალაქ შანკსვილთან ჩამოვარდა.

ტერაქტების სერიას სამი ათასამდე ადამიანი ემსხვერპლა.