უკრაინამ შესაძლოა, მიხეილ სააკაშვილის საქართველოში ექსტრადირება არ განახორციელოს, ვიდრე საქართველოში სასამართლო მის საქმეებზე განაჩენს არ გამოაცხადებს. ამის შესახებ უკრაინული ტელეკომპანია 112-ის ეთერში უკრაინის იუსტიციის მინისტრის მოადგილემ, დენის ჩერნიშოვმა განაცხადა.

„ჯერ უკრაინაში არაფერი მომხდარა, სააკაშვილის საზღვარზე გადასვლის გარდა. დოკუმენტები, რომლებიც მივიღეთ ჩვენ და უკრაინის გენერალურმა პროკურატურამ მიხეილ სააკაშვილთან დაკავშირებით, მეტყველებს, რომ საქართველოში მის წინააღმდეგ სისხლის სამართლის საქმეები განიხილება. ეს ექსტრადირების განხორციელების მორიგი ეტაპი არ არის და ამ ეტაპში იუსტიციის სამინისტრო არ მონაწილეობს. საქართველოში მიხეილ სააკაშვილი უკვე რომ გაესამართლებინათ იმ მუხლებით, რომლებიც პრესკონფერენციაზე ჩემმა კოლეგამ, ბატონმა პეტუხოვმა (იუსტიციის მინისტრის მოადგილემ) დაასახელა, მაშინ ეს იქნებოდა იუსტიციის სამინისტროს ნაწილობრივი პრეროგატივა“, - განაცხადა დენის ჩერნიშოვმა.

კითხვაზე, შეუძლია თუ არა უკრაინას, არ გადასცეს მიხეილ სააკაშვილი საქართველოს სასამართლოს გადაწყვეტილებამდე, ჩერნიშოვმა დადებითად უპასუხა.

8 სექტემბერს უკრაინის გენერალურმა პროკურატურამ დაადასტურა საქართველოს იუსტიციის სამინისტროს მთავარი პროკურატურისგან მიხეილ სააკაშვილის ექტსრადირების მოთხოვნის მიღება. როგორც მაშინ უკრაინის იუსტიციის მინისტრის მოადგილემ, სერგე პეტუხოვმა განაცხადა, საქართველოში მიხეილ სააკაშვილს ბრალი ედება სისხლის სამართლის კოდექსის ოთხი მუხლით: 182-ე - თანამდებობის ბოროტად გამოყენების გზით სხვისი ქონების მითვისება, გაფლანგვა, 333-ე და 117-ე - თანამდებობრივი მდგომარეობის ბოროტად გამოყენება ძალადობისა ან იარაღის გამოყენების გზით და ჯანმრთელობისთვის მძიმე ზიანის განზრახ მიყენება, 332-ე მუხლის მეორე ნაწილი -თანამდებობის პირის მიერ სამსახურებრივი მდგომარეობის ბოროტად გამოყენება.