აუდიტის სამსახურის მიერ გამოქვეყნებული მიმდინარე შემოწირულებების მონიტორინგის შუალედური შედეგების მიხედვით, 2017 წლის 1-ლი ივლისიდან 12 სექტემბრის ჩათვლით ყველაზე მეტი შემოწირულება მიღებული აქვს „ქართულ ოცნებას“ 7 343 993 ლარის ოდენობით, მას მოსდევს „ევროპული საქართველო“ - 323 675 ლარი და 45 თეთრი, „საქართველოს პატრიოტთა ალიანსი“ - 15 600 ლარი, ა„ხალი პოლიტიკური ცენტრი - გირჩი“ - 15 300 00 ლარი.

საერთო ჯამში, პარტიების მიმართ შემოწირულებების საერთო ოდენობამ 7 726 993 ლარი და 45 თეთრი შეადგინა.

რაც შეეხება „ნაციონალური მოძრაობის“ შემოწირულებებს, პარტია თანხის ოდენობით მეშვიდე ადგილზეა. მათმა დაფინანსებამ 5 532 ლარი შეადგინა.

ყველაზე მცირე დაფინანსება აქვს „რესპუბლიკურ პარტიას“ 40 ლარის ოდენობით.

როგორც აუდიტის სამსახურის ხელმძღვანელის მოვალეობის შემსრულებელმა, ნინო ლომჯარიამ განმარტა, ამ ეტაპზე 100-ზე მეტი პირის შესახებ აქვთ გამოთხოვილი ინფორმაცია შემოსავლების სამსახურიდან, რათა მიიღონ რწმუნება იმის შესახებ, რომ ამ პირებს ნამდვილად ჰქონდათ შესაბამისი შემოსავალი წლის განმავლობაში.

„ჩვენ დაბარებული გვყავს 14 ფიზიკური პირი, აქედან ხუთი არის „ევროპული საქართველოდან“, რვა „ქართული ოცნების“ შემომწირველი, რომელთა შემოსავლებთან დაკავშირებით გარკვეული ეჭვები გვაქვს. ჩვენ ამ პირებთან ვაპირებთ გასაუბრებას. გვაქვს ორი საჩივარი შემოსული. ერთი ეხება ალეკო ელისაშვილის განცხადებას, რომლითაც ის გვთხოვს რეაგირებას „ფეისბუქ“ გვერდის საშუალებით მისი კანდიდატურის წინააღმდეგ დაფინანსებულ კამპანიაზე. ხოლო მეორე „ნაციონალური მოძრაობის“ განცხადებაა, მიკროავტობუსებზე „ქართული ოცნების“ სარეკლამო პოსტერების 2016 წლის საპარლამენტო არჩევნების პერიოდიდან არსებობის შესახებ“, - განაცხადა ლომჯარიამ.