პოლონეთის მთავრობას აქვს ერთი თვე, რომ სასამართლო სისტემის რეფორმირებასთან დაკავშირებით ევროკომისიის კითხვებს ამომწურავად უპასუხოს. ამის შესახებ ევროკომისიის პრესსპიკერმა განაცხადა.

ბრიუსელში ამბობენ, რომ საკითხის განხილვა შესაძლოა ევროკავშირის სასამართლოში გაგრძელდეს. ევროკომისიამ პოლონეთის ნაციონალისტური მთავრობის წინააღმდეგ სამართლაწარმოება ივლისში დაიწყო.

პოლონეთში სასამართლო რეფორმის განხორციელება მმართველი „კანონისა და სამართლიანობის პარტიის“ ინიციატივაა. კრიტიკოსები ამბობენ, რომ რეფორმის განხორციელების შემთხვევაში, მთავრობა სასამართლო სისტემაზე კონტროლს აიღებს, რასაც სასამართლოსთვის უარყოფითი შედეგი ექნება. ცვლილებების დამტკიცება ნიშნავს, რომ უზენაესი სასამართლოს მოსამართლეებს ან გადააყენებენ ან შეცვლიან.

სასამართლო ცვლილებებთან დაკავშირებით პოლონეთის დედაქალაქ ვარშვაში საპროტესტო აქცია გაიმართა. პოლონეთის ხელისუფლება ევროკავშირს შანტაჟსა და გაუმართლებელ კრიტიკაში სდებს ბრალს.