სამი ევროპული სახელმწიფოს მთავრობა - საფრანგეთი, გაერთიანებული სამეფო და ნიდერლანდები, კარიბის ზღვაში საკუთარი იურისდიქციის ქვეშ მყოფ ტერიტორიებზე სტიქიის ზარალს ითვლიან და მოსახლეობას დახმარებას პირდებიან.
BBC-ს ცნობით, საფრანგეთის პრეზიდენტი ემანუელ მაკრონი კარიბის ზღვაში მდებარე კუნძულ გვადელუპეზე ჩავიდა. მოსახლეობას მთავრობამ ჰუმანიტარული ტვირთი ჩაუტანა. მაკრონმა კუნძულის მცხოვრებლებს პირობა მისცა, რომ ინფრასტრუქტურა უახლოეს თვეებში თავიდან გაიმართება. მისი თქმით, ოფიციალური პარიზი მზად არის, დასახმარებლად ბიუჯეტიდან თანხა გამოყოს.
დიდი ბრიტანეთის ვირჯინის კუნძულებსა და ანგილიაზე ქარიშხალ „ირმას“ შედეგად დაზარალებულ მოსახლეობასთან შესახვედრად გაერთიანებული სამეფოს საგარეო საქმეთა მინისტრი ბორის ჯონსონი გაემგზავრა. კუნძულ სენ-მარტენზე ნიდერლანდების მეფე უილემ ალექსანდრიც ჩავიდა.
ქარიშხალ „ირმას“ კარიბის ზღვის კუნძულებზე საერთო ჯამში 23 ადამიანის სიცოცხლე ემსხვერპლა.