მიანმარის დე ფაქტო ლიდერი აუნ სან სუ ჩი გაერო-ს გენერალურ ასამბლეას არ დაესწრება. ინფორმაცია დე ფაქტო პრეზიდენტის პრესსპიკერმა გაავრცელა. BBC-ის ცნობით, აღნიშნული გადაწყვეტილება აუნ სან სუ ჩიმ დასავლეთში მის წინააღმდეგ გამოთქმულ მწვავე კრიტიკული შეფასებების შემდეგ მიიღო.

ნობელის პრემიის ლაურეატს მშვიდობის დარგში და ყოფილ პოლიტპატიმარ აუნ სან სუ ჩის დასავლეთი, რომელიც ერთ დროს მისი მხარდამჭერი იყო, როხინჯას კრიზისისა და მუსლიმების მიმართ ძალადობის ესკალაციაში ადანაშაულებს.

25 აგვისტოს მიანმარის დასავლეთით მდებარე რაკჰაინის შტატში სამხედროებმა მუსლიმი მოსახლეობის სოფლები გადაწვეს, ასობით ადამიანი კი სასტიკი მეთოდებით მოკლეს. მათ შორის იყვნენ ბავშვებიც. მუსლიმი როხინჯას ჯგუფის 370 ათასი წევრი ბანგლადეშში ლტოლვილის სტატუსით გაიქცა.

მიანმარში განხორციელებული ძალადობა რელიგიური და ეთნიკური უმცირესობის წინააღმდეგ გაერო-მ ეთნიკურ წმენდად შეაფასა. სხვადასხვა ქვეყნის ლიდერებმა აუნ სან სუ ჩის მოუწოდეს, მიმდინარე პროცესები დაუყოვნებლივ შეაჩეროს. მას წერილით მიმართეს ნობელის პრემიის ლაურეატებმა მშვიდობის დარგში და ადამიანის უფლებების დაცვისკენ მოუწოდეს. პაკისტანელმა უფლებადამცველმა, მალალა იუსუფზაიმ აუნ სან სუ ჩის სთხოვა, მუსლიმი როჰინჯების მიმართ გამოჩენილ ძალადობრივ ქმედებას წინ აღუდგეს.

აუნ სან სუ ჩიმ, რომელიც მიანმარის მთავრობის ლიდერად 2015 წელს არჩევნების გზით მოვიდა, განაცხადა, რომ რაკჰაინის შტატში ყველა ადამიანი უფლება დაცულია.

საერთაშორისო პორტალ Change.org-ზე პეტიცია გამოქვეყნდა მოთხოვნით, ჩამოერთვას აუნ სან სუ ჩის 1991 წელს მიღებული ნობელის პრემია. ამ დროისათვის პეტიციას 418,338 ადამიანმა მოაწერა ხელი.

წყარო: BBC, Reuters