პარლამენტის თავმჯდომარე ირაკლი კობახიძე ვენეციის კომისიის მხრიდან კონსტიტუციური ცვლილებების პროექტთან მიმართებაში უარყოფითი დასკვნის დადებას არ ელოდება, თუმცა ვარაუდობს, რომ მოსაზრებები გამოთქმული პროპორციული სისტემის ამოქმედების თარიღზე იქნება.

როგორც პირველ არხს ირაკლი კობახიძემ განუცხადა, საკონსტიტუციო ცვლილებების მესამე მოსმენით მიღების თარიღი ბოლომდე დაზუსტებული არის და ეს საკითხი მას შემდეგ გაირკვევა, რაც მმართველ გუნდს პარტნიორებთან კონსულტაციები ექნება.

„კონსტიტუციის ტექსტთან დაკავშირებით უარყოფით შეფასებებს იმ მარტივი მიზეზის გამო არ ველოდები, რომ კონსტიტუციასთან დაკავშირებით ვენეციის კომისიას თავისი კომენტარები უკვე მოწოდებული აქვს. მან ის ცვლილებები ძალიან დადებითად შეაფასა, რომელიც კონსტიტუციაში ხორციელდება. გარდა ამისა, ვენეციის კომისიას კონკრეტულ საკითხებთან დაკავშირებით წარმოდგენილი 20-ზე მეტი შენიშვნა ჰქონდა და ეს შენიშვნები ზედმიწევნით გავითვალისწინეთ. ეს არის საერთო სურათი. ერთადერთი, რასთან დაკავშირებითაც შეიძლება ვენეციის კომისიის მოსაზრება მოვისმინოთ, ეს პროპორციული არჩევნების თარიღია. ამასთან დაკავშირებით, მეც ჩემი სუბიექტური პოზიცია მაქვს. პირადად, მეც მერჩივნა, რომ პროპორციული სისტემა 2020 წლიდან ამოქმედებულიყო, თუმცა ამის შესაძლებლობა ოპოზიციამ არ მოგვცა. მათმა არასწორმა პოზიციამ განაპირობა ის, რომ ჩვენ პროპორციულ სისტემაზე აუცილებლად გადავდივართ, თუმცა ეს მას შემდეგ მოხდება, რაც 2020 წლის საპარლამენტო არჩევნები ჩატარდება“, - განაცხადა კობახიძემ.

სპიკერის მოსაზრებით, კონსტიტუციასთან მიმართებაში ძალიან დახვეწილი ტექსტია ჩამოყალიბებული, რომელიც იმას უზრუნველყოფს, რომ საქართველოში ავტოკრატიული რეჟიმი არავითარი ფორმით აღარასოდეს განმეორდება, რაც ქვეყნის პრობლემა 90-იანი წლებიდან იყო.

„საკონსტიტუციო ცვლილებების მთავარი მიზანი ხელისუფლების დანაწილების, დემოკრატიისა და სამართლებრივი სახელმწიფოს პრინციპების უზრუნველყოფაა. ეს მიზნები ზედმიწევნით იქნება მიღწეული იმ ცვლილებებით, რომელიც საქართველოს პარლამენტის მიერ დამტკიცდება“, - ამბობს სპიკერი.

კითხვაზე, პრეზიდენტი გამოიყენებს თუ არა ვეტოს უფლებას, კობახიძე აცხადებს, რომ ეს პრეზიდენტის პრეროგატივაა.

„მას ვეტოს დადების უფლება აქვს, ჩვენი უფლებამოსილება ვეტოს გადალახვაა. შესაბამისად, როგორც პრეზიდენტი, ასევე პარლამენტი ჩვენი უფლებამოსილების ფარგლებში ვიმოქმედებთ“, - დასძინა კობახიძემ.

პირველი არხის ინფორმაციით, მმართველი გუნდი კონსტიტუციური პროექტის მესამე მოსმენით დამტკიცებას 26 სექტემბერს გეგმავს. იქიდან გამომდინარე, რომ დარჩენილია ცვლილებების რედაქციული სახით განხილვის რეჟიმი, დოკუმენტში მხოლოდ ტექნიკური საკითხების გათვალისწინება მოხდება. ცვლილებების მიღებისთვის საჭირო 113 დეპუტატის ხმაა.

პარლამენტმა საკონსტიტუციო ცვლილებები პირველი და მეორე მოსმენის რეჟიმში საგაზაფხულო სესიის ბოლოს მიიღო.