ქვევრი დღეიდან ღვინის მსოფლიო ცივილიზაციის ცენტრის მუდმივი ექსპოზიციის ნაწილია. უნიკალური არქეოლოგიური და ეთნოგრაფიული ნიმუშები, რომლებიც საქართველოს ეროვნულ მუზეუმში ინახება, საფრანგეთში, ქალაქ ბორდოში გამოიფინა.
გამოფენა სახელწოდებით, „საქართველო - მეღვინეობის აკვანი“ საქართველოს პრემიერ-მინისტრმა გიორგი კვირიკაშვილმა გახსნა.
საქართველო არის პირველი მიწვეული ქვეყანა, რომელმაც მევენახეობა-მეღვინეობის გამოფენათა ციკლი გახსნა და ღვინის ცივილიზაციის მუზეუმის საპატიო მასპინძელია.
ექსპოზიცია, რომელიც ქართული ღვინის კულტურას წარმოაჩენს და ქართული მეღვინეობის 8 000-წლიან ისტორიას ასახავს, საქართველოს ეროვნულმა მუზეუმმა მოამზადა.
4-თვიანი გამოფენის განმავლობაში არაერთი ღონისძიება გაიმართება. გამოფენა - „საქართველო-მეღვინეობის აკვანი“ 5 ნოემბრის ჩათვლით გაგრძელდება.