ე.წ. კორტების სპეცოპერაციის საქმეზე მსჯავრდებულ ირაკლი ფირცხალავას მეუღლემ ჟურნალისტებთან ის აუდიოჩანაწერი გაასაჯაროვა, რომელშიც კრიმინალური პოლიციის ყოფილი უფროსი ოჯახის წევრებთან "კორტების საქმის" მთავარ მოწმეზე კობა გოგატიშვილზე საუბრობს. ჩანაწერში ირაკლი ფირცხალავა აცხადებს, რომ კობა გოგატიშვილი, რომელმაც კორტების საქმეზე მისი საწინაამღდეგო ჩვენება მისცა, ცრუ მოწმეა და რეალურად საქმესთან შემხებლობა არ აქვს. ირაკლი ფირცხალავა ციხიდან იმასაც ამბობს, რომ გოგატიშვილს ინფორმაცია არა "კორტების საქმეზე", არამედ ზურაბ ვაზაგაშვილის მამის, იური ვაზაგაშვილის მკლელობასთან დაკავშირებით აქვს და საგამოძიებო უწყებებმა ის უნდა დაკითხონ. სატალეფონო საუბარი ვიდეოჩანაწერში ისმის, რომელიც ფირცხალავას მეუღლემ ჟურნალისტებს თავად გადასცა. "მივმართავთ პრეზიდენტს, დაგვეხმაროთ მოქალაქეობის ჩამორთმევაში, ამის შემდეგ მოვითხოვთ პოლიტიკურ თავშესაფარს. ჩვენს ოჯახს დევნიან. ჩემი მეუღლე ამბობს, რომ სანამ იური ვაზაგაშვილი იყო ცოცხალი, მოწმე კობა გოგატიშვილმა მოისმინა, რომ იგეგმებოდა მისი მკვლელობა. ჩემი მეუღლე ითხოვს ამ ამბის გამოძიებას, სასწრაფოდ. თუ დაკითხავენ, დეტალურად მოყვება. ჩემს მეუღლეს ეს ინფორმაცია ადვოკატისგან აქვს. ამის შესახებ თავად გოგატიშვილი საუბრობდა. მან ამაზე სახალხო დამცველთან ისაუბრა", - განაცხადა ნინო ხვიტიამ.