ლონდონში „პარსონ გრინის“ მეტროპოლიტენში მომხდარ აფეთქებას პოლიციამ ტერაქტის კვალიფიკაცია მიანიჭა.

ბოლო მონაცემებით, საავადმყოფოში სხვადასხვა ხარისხის დამწვრობით 22 ადამიანია გადაყვანილი. სააგენტო „ბი-ბი-სის“ ინფორმაციით, ხელნაკეთი ასაფეთქებელი მოწყობილობა წამმზომიან მექანიზმს შეიცავდა. მოწყობილობა პოლიეთილენის პარკში შეფუთულ პლასტმასის სათლში იყო დამალული, რომელიც მატარებლის ვაგონში, გასასვლელთან იდგა.

აფეთქების შედეგად, მგზავრები პანიკამ მოიცვა და ჭყლეტა გამოიწვია. მომხდართან დაკავშირებით, უახლოეს საათებში პრემიერ-მინისტრი ტერეზა მეი მთავრობის საგანგებო კომიტეტის შეხვედრას გამართავს. პრემიერი ინციდენტის შედეგად დაშავებულ თანამოქალაქეებს თანაგრძნობას უცხადებს.

ამ დროისთვის „პარსონ გრინის“ მეტროსადგური დაკეტილია. უსაფრთხოების მიზნით, დროებით დაიხურა ამავე სარკინიგზო ხაზის რამდენიმე მეტროსადგურიც. ტერიტორიაზე პატრულირებს ვერტმფრენიც.