ოდესაში მდებარე საბავშვო ბანაკში გვიან ღამით გაჩენილი ხანძრის შედეგად ორი ბავშვი დაიღუპა.
ხანძარი ღამის 4:00 საათზე საბავშვო ბანაკ „ვიქტორიაში“ გაჩნდა. შენობაში მყოფი მოზარდების ევაკუაცია განხორციელდა, თუმცა მოგვიანებით გაირკვა, რომ სამი მათგანი ალმოდებულ კორპუსში დარჩა. მათ რამდენიმე საათის განმავლობაში ეძებდნენ. მეხანძრეებმა ორი მოზარდის ცხედარი შენობაში იპოვა, მესამეს ამ დრომდე ეძებენ.
შენობიდან ევაკუირებულ ბავშვებთან ამ წუთებში ფსიქოლოგები მუშაობენ.
უკრაინული მედიის ცნობით, ბანაკში ხანძრის საწინააღმდეგო სიგნალიზაცია მწყობრიდან იყო გამოსული და არ მუშაობდა. აღნიშნული ინფორმაცია ოდესის პოლიციამაც დაადასტურა. ადგილზე სამართალდამცველები იმყოფებიან და ხანძრის გამომწვევი მიზეზების დასადგენად მუშაობენ.