2018 წლის ფუტსალის ევროპის ჩემპიონატის პლეი-ოფის პირველი შეხვედრა საქართველის ნაკრებმა რუმინეთთან გასვლაზე 2:2 დაასრულა.

როგორც პირველ არხთან ნაკრების მთავარმა მწვრთნელმა ავთანდილ ასათიანმა განაცხადა, ამ შეხვედრაში გუნდის ერთ-ერთი საკვანძო მოთამაშე დაშავდა.

„სამწუხაროდ, რუმინეთში ჩვენი გუნდის ერთ-ერთი უმნიშვნელოვანესი ფიგურა, გიორგი ნიშნიანიძე დაშავდა. მასპინძლები ძალიან უხეშობდნენ და გიორგის ლამის ფეხი წააცალეს. ნაკრებში რომ ეთამაშა, 18 საათი იფრინა, ჩამოვიდა რუმინეთში და 9 წუთში დასვენება მოუხდა. უკვე დანამდვილებით შემიძლია გითხრათ სამწუხარო ამბავი, რომ ნიშნიანიძე მეორე შეხვედრაში ვერ დაგვეხმარება. თუმცა მზად იქნება მეკარე ზვიად კუპატაძე და დისკვალიფიცირებულები არჩილ სეფისკვერაძე და შოთა ჭანუყვაძეც დაგვემატებიან", - ამბობს ასათიანი.

საქართველოს ნაკრები პლეი-ოფის განმეორებით შეხვედრას თბილისში 26 სექტემბერს გამართავს. ორმატჩიან დაპირისპირებაში გამარჯვების შემთხვევაში საქართველოს ნაკრები ევროპის ჩემპიონატზე ითამაშებს, რომელიც 2018 წელს სლოვენიაში გაიმართება.