გერმანიის ქალაქ კელნში ქურთების დემონსტრაციის დროს ერთი სამართალდამცველი დაშავდა.
გავრცელებული ინფორმაციით, აქციის ერთ-ერთი მონაწილე საბუთების შემოწმებისთვის თავის არიდებას შეეცადა. მას პოლიციის ოფიცერი დაედევნა, თუმცა დემონსტრაციაზე მყოფმა კიდევ ერთმა პირმა სამართალდამცველს ხელი კრა, რის შედეგადაც, ის წაიქცა და თავის ტრავმა მიიღო.
ქურთების დემონსტრაცია კელნში ქურთების მუშათა პარტიის ლიდერის, აბდულა ოჯალანის გათავისუფლებისა და ქურთისტანის დამოუკიდებლობის მოთხოვნით გაიმართა. აქციაში 10 ათასამდე ადამიანმა მიიღო მონაწილეობა. კვირას კი, ანალოგიური აქცია ვაშინგტონშიც არის დაგეგმილი.
აღსანიშნავია, რომ 25 სექტემბერს ერაყის ქურთისტანი დამოუკიდებლობის რეფერენდუმის ჩასატარებლად ემზადება, რომელიც ასევე ქურთისტანის ტერიტორიის მიღმა მდებარე კირკუკისა და ნინევიის რეგიონებშიც გაიმართება, რაც ერაყის ხელისუფლების განსაკუთრებულ შეშფოთებას იწვევს.