ტყიბულის N2 საჯარო სკოლაში სასწავლო პროცესი უკვე მეორე დღეა პროტესტის ფონზე მიმდინარეობს. სკოლასთან პედაგოგები და მშობლები არიან შეკრებილნი. ისინი სასწავლო პროცესის მეორე ცვლაში გადატანას აპროტესტებენ. ამ მიზეზით, უკვე მეორედ, სკოლაში დღეს 100 მოსწავლე საკლასო ოთახებში არ შევიდა.

სკოლას მეორე ცვლა მას შემდეგ დაემატა, როდესაც სამხარაულის ექსპერტიზის ბიუროს დასკვნის შედეგად გაირკვა, რომ მე-2 საჯარო სკოლის შენობა ამორტიზებულია. სწორედ ამ სასწავლო დაწესებულების მოსწავლეების გადანაწილება მოხდა პირველ საჯარო სკოლაში.

„სკოლის შენობა ავარიულია, ამიტომ გადაგვიყვანეს სხვა სკოლაში, სადაც გრაფიკი არ გვაწყობს. გადაგვიყავნეს პირველ საჯარო სკოლაში, სადაც არ არის საკმარისი ოთახები. ამიტომაც გადაუწიეს ბავშვებს ორ საათამდე სწავლის დაწყება. ჩვენ ამას არ შევეგუებით. გამოგვიყონ ფართი, სადაც უნდათ, მთავარია, ბავშვებმა პირველ სმენაში ისწავლონ, წინააღმდეგ შემთხვევაში, შვილებს სკოლაში არ გავუშვებთ და საერთოდ გაუქმდება ეს სკოლა“, - განაცხადა პირველ არხთან ხათუნა დალაქიშვილმა.

ტყიბულის N2 საჯარო სკოლაში სულ 119 მოსწავლე სწავლობს.