ოდესის ყოფილი გუბერნატორის, მიხეილ სააკაშვილის ადვოკატი ნაზარ კულჩუტსკი არ გამორიცხავს, რომ უკრაინის საზღვრის უკანონო გადაკვეთის ფაქტთან დაკავშირებული სასამართლო პროცესი 18 სექტემბერს არ შედგეს.

„სასამართლო პროცესი სავარაუდოდ 18 სექტემბერს, 15:00 საათზე უნდა გაიმართოს. ეს თარიღი და დრო სასაზღვრო სამსახურის წარმომადგენლებმა პროტოკოლში ჩაწერეს, თუმცა სასამართლოსგან ოფიციალური დასტური ჯერ არ გვაქვს“, - ამბობს ადვოკატი.

როგორც ნაზარ კულჩუტსკი ​პირველ არხთან აცხადებს, სასამართლო მესაზღვრეების მიერ შედგენილ პროტოკოლზე იმსჯელებს, რათა დადგინდეს, დაარღვია თუ არა მიხეილ სააკაშვილმა სახელმწიფო საზღვრის გადაკვეთის წესები.

„საუბარია უკრაინის ადმინისტრაციულ სამართალდარღვევათა კოდექსის 204-ე პირველი პრიმა მუხლზე, რაც საზღვრის უკანონოდ გადაკვეთას ან უკანონოდ გადაკვეთის მცდელობას გულისხმობს. კანონდარღვევა სანქციის სახით ჯარიმას ითვალისწინებს. ჯარიმის ზუსტ ოდენობას ვერ გეტყვით, თუმცა ის რამდენიმე ასეულ გრივნას შეადგენს“, - აცხადებს ადვოკატი.

შეგახსენებთ, საქართველოს ყოფილი პრეზიდენტისა და ოდესის ოლქის ყოფილი გუბერნატორის, მიხეილ სააკაშვილის მიერ უკრაინის სახელმწიფო საზღვრის უკანონო გადაკვეთის ფაქტზე გამოძიება რამდენიმე დღის წინ დაიწყო.


10 სექტემბერს შეგინის სასაზღვრო პუნქტთან, უკრაინის ტერიტორიაზე მყოფმა სააკაშვილის მხარდამჭერებმა კორდონი გაარღვიეს, საკონტროლო-გამშვებ პუნქტზე შეიჭრნენ და სააკაშვილი უკრაინის ტერიტორიაზე გადაიყვანეს, რის შემდეგაც მიხეილ სააკაშვილი, მხარდამჭერებთან ერთად, ლვოვში ჩავიდა.