პირველი არხის გადაცემა „წიგნების თაროს" მეოთხე სეზონისთვის რეგისტრაცია დაიწყო.

მომდევნო სეზონისთვის განახლებულ გადაცემაში მონაწილეობის მსურველმა სკოლებმა რეგისტრაციისთვის სპეციალური აპლიკაცია პირველი არხის ვებ გვერდზე, ან გადაცემის ფეისბუქ ოფიციალურ გვერდზე უნდა შეავსონ. ახალი სეზონიდან გადაცემაში ბევრი საინტერესო ცვლილებაა.

შეიცვალა მონაწილეთა ასაკობრივი ზღვარი, შოუში მონაწილეობა მე- 10 მე- 11 და 12- ე კლასის მოსწავლეებს შეეძლებათ. რეგისტრაცია 6 ოქტომბრამდე გაგრძელდება . ახალი სეზონიდან წიგნების თარო უფრო მასშტაბური, ინოვაციური და მრავალფეროვანი იქნება: იზრდება გადაცემის თემატიკა და ლიტერატურის გარდა სხვა შემეცნებით სფეროებსაც მოიცავს. შვიდი ტრადიციულ ლიტერატურის რაუნდს ახალი სეზონიდან ორი ახალი რაუნდი კინოეკრანიზაცია და ასოციაცია დაემატება.

გარდა ამისა, თამაშის ხანგრძლივობის გაზრდასთან ერთად, წიგნების თაროს ახალი გარდამავალი ეტაპი დაემატება, სადაც კითხვების თემატიკა ხელოვნება, მეცნიერება და სპორტი იქნება.

გადაცემის წამყვანმა ალექსანდრე ლორთქიფანიძემ პირველ არხთან საუბარში განაცხადა, რომ სატელევიზო შოუში არაერთი საინტერესო წამოწყებაა ჩაფიქრებული.

მისი თქმით, განსაკუთრებით გააქტიურდება ვებ პლატფორმა და „წიგნების თაროს“ ოფიციალური ფეისბუქ გვერდი, სადაც ყოველდღიურად ვიქტორინები, გათამაშებები ლიტერატურული კონკურსები და დამოუკიდებელი პროექტები განხორციელდება.

ახალგაზრდული ლიტერატურული შოუს წამყვანი ალექსანდრე ლორთქიფანიძე მომავალ მოთამაშეებს ურჩევს წიგნი უყვარდეთ და თამაშში მოხვედრის შემთხვევაში საკუთარი ცოდნა გამოავლინონ. თამაშში 32 რჩეული სკოლის გუნდი მონაწილეობს თითოეული გუნდი კი სამი მოსწავლისაგან შედგება.

პროექტის გამარჯვებული მომდევნო სეზონის დასრულების შემდეგ ტრადიციულად კემბრიჯის საზაფხულო სკოლაში გაემგზავრება.