კანონის აღსრულების პრობლემა თუ სამართალდამცავთა მხრიდან დაგვიანებული რეაგირება - თბილისის მოსახლეობის ნაწილს ღამის საათებში გადაჭარბებული ხმაური ისევ აწუხებს. ეს იმ ფონზე, როცა შესაბამისი კანონის ამოქმედებიდან თვეზე მეტია გასული.
პრობლემა განსაკუთრებით მწვავედ ქალაქის იმ უბნებში დგას, სადაც ერთ სივრცეში რამდენიმე კაფე-ბარია განთავსებული.
ხმაურის დასაშვები ნორმის გადაჭარბების მიუხედავად, სამართლებრივი რეაგირება ზოგჯერ მაინც არ ხდება იმ მიზეზით, რომ მაღალი ხმა ერთდროულად რამდენიმე ობიექტიდან ფიქსირდება.
მოქალაქეები საპატრულო პოლიციის მხრიდან დაგვიანების ფაქტებზე და ხმაურის მზომი ხელსაწყოების გამოყენების ხარვეზებზეც მიუთითებენ.
გვანცა გავაშელი არკვევდა, რატომ არ მოქმედებს ეფექტურად ადმინისტრაციულ სამართალდარღვევათა კოდექსში მწვავე საპარლამენტო განხილვების შემდეგ შესული ცვლილებები, რომლებიც სხვადასხვა დაწესებულებას ხმაურის სხვადასხვა ნორმას უწესებს.