სამეგრელო-ზემო სვანეთის სამხარეო ადმინისტრაციის შენობასთან აქციის მონაწილეები გზის გადაკეტვას ცდილობენ. როგორც პირველი არხის ჟურნალისტი ადგილიდან იუწყება, სამართალდამცავები აქციის მონაწილეებს ამის საშუალებას არ აძლევენ.
აქციის მონაწილეების თქმით, დღეს სამეგრელო-ზემო სვანეთის სამხარეო ადმინისტრაციის შენობასთან შიმშილობას დაიწყებენ. აქციის მონაწილეებსა და ადგილობრივ ხელისუფლებას შორის შეხვედრა უშედეგოდ დასრულდა.
როგორც შეხვედრიდან გამოსულმა აქციის მონაწილეებმა პირველ არხს განუცხადეს, ხელისუფლებას რამდენიმე მოთხოვნა წაუყენეს. კერძოდ, ხელისუფლებისგან ითხოვენ, რომ აზიური ფაროსანას მიერ მიყენებული ზარალი აუნაზღაუროს, ასევე ითხოვენ პრემიერ-მინისტრ გიორგი კვირიკაშვილთან შეხვედრას. ამასთან, აქციის მონაწილეებს სურთ, რომ გადავადდეს საბანკო ვალდებულებები და გაგრძელდეს ფაროსანას წინააღმდეგ ბრძოლის ღონისძიებები.
როგორც პირველი არხის ჟურნალისტი ადგილიდან იტყობინება, აქციის მონაწილეებს კომპენსაციის გაცემაზე უარი უთხრეს.