საქართველოს ყოფილი პრეზიდენტის, მიხეილ სააკაშვილის ბრალდების საქმეზე სასამართლო პროცესები გრძელდება. მას მთავარი საგამოძიებო უწყება სამსახურებრივი უფლებამოსილების ბოროტად გამოყენებას ედავება.
საუბარია სანდრო გირგვლიანის მკვლელობისთვის გასამართლებული პირების აფციაურის, ღაჭავას, ბიბილურიძისა და ალანიას შეწყალებაზე. ისინი 2006 წელს დამანაშავედ სცნეს, 2008 წელს კი პრეზიდენტის შეწყალების საფუძველზე პატიმრობიდან გათავისუფლდნენ.
სასამართლო სხდომა ბრალდების მხარის მტკიცებულებების გამოკვლევით განახლდა. დღევანდელ სხდომაზე პროკურატურა იმ სიდი დისკებს იკვლევს, რომელზეც მოთავსებულია ვიდეო და აუდიო სიუჟეტები, რომლებიც გირგვლიანის მკვლელობის საქმეზე მომზადდა.
პროკურორ ირაკლი ნადარეიშვილის განმარტებით, მტკიცებულებები ადასტურებს, რომ მიხეილ სააკაშვილი გაურიგდა მსჯავრდებულებს და მათი აღიარების სანაცვლოდ როგორც ფულადი კომპენსაცია, ასევე საპატიმრო დაწესებულების ორ წელიწადში დატოვების პირობა მიიღეს, რაც მიხეილ სააკაშვილმა შეასრულა.