ე.წ. ციანიდის საქმეზე პროკურატურა პირველი ინსტანციის სასამართლოს გადაწყვეტილებას, კვალიფიკაციის ნაწილში, სააპელაციო სასამართლოში გაასაჩივრებს. ამის შესახებ საზოგადოებრივ მაუწყებელს მთავარი პროკურატურის საზოგადოებასთან და მასმედიასთან ურთიერთობის დეპარტამენტის უფროსმა განუცხადა.

ნათია სუხიაშვილის განმარტებით, თბილისის საქალაქო სასამართლომ 2017 წლის 5 სექტემბერს განზრახ მკვლელობის მომზადებასა და ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვაში ბრალდებული გიორგი მამალაძე დამნაშავედ ცნო საქართველოს სისხლის სამართლის კოდექსის 18,108-ე მუხლითა და 236-ე მუხლის მე-2 ნაწილით და განუსაზღვრა 9 წლით თავისუფლების აღკვეთა.

საქართველოს მთავარი პროკურატურა განმარტავს, რომ გიორგი მამალაძეს ბრალდება წარდგენილი ჰქონდა საქართველოს სისხლის სამართლის კოდექსის 18,109-ე მუხლის მესამე ნაწილის „გ“ ქვეპუნქტით, რომელიც გულისხმობს განზრახ მკვლელობის მომზადებას ანგარებით.