ცნობილი ქართველი საოპერო მომღერალი ზურაბ სოტკილავა სამშობლოში ჩამოასვენეს. თბილისის საერთაშორისო აეროპორტში გარდაცვლილის ოჯახის წევრები და მეგობრები იყვნენ შეკრებილი.

ზურაბ სოტკილავა 80 წლის ასაკში 18 სექტემბერს გარდაიცვალა.

მომღერალი სოხუმში 1937 წლის 12 მარტს დაიბადა, დაამთავრა თბილისის სახელმწიფო კონსერვატორია. 1965-1974 წლებში იყო ზაქარია ფალიაშვილის სახელობის თბილისის ოპერისა და ბალეტის აკადემიური თეატრის სოლისტი. 1966-1968 წლებში სტაჟირება გაიარა მილანის საოპერო თეატრ "ლა სკალაში".

1974 წლიდან იყო მოსკოვის დიდი თეატრის სოლისტი. მის მიერ შესრულებული გამორცეული პარტიებია - აბესალომი (ფალიაშვილი „აბესალომ და ეთერი“), არზაყანი (თაქთაქიშვილის „მთვარის მოტაცება“), ვოდემონი (ჩაიკოვსკის „იოლანტა“), მანრიკო, ოტელო, რიჩარდი, რადამესი, ჰერცოგი (ვერდის "ტრუბადური", "ოტელო", "ბალ-მასკარადი", "აიდა", "რიგოლეტო"), ხოზე (ბიზეს "კარმენი"), კავაროდოსი (პუჩინის "ტოსკა"), ედგარი (დონიცეტის "ლუჩია დი ლამერმური"), ინდოელი სტუმარი (რიმსკი-კორსაკოვის "სადკო") და სხვა. მომღერალი არაერთი საპატიო ჯილდოს მფლობელია, როგორც საქართველოში, ისე საზღვარგარეთ. მათ შორის, იყო საქართველოს დამსახურებული არტისტი და შოთა რუსთაველის სახელმწიფო პრემიის ლაურეატი.

თბილისში სამოქალაქო პანაშვიდები მომღერლის საცხოვრებელ ბინაში, შემდეგ კი ოპერის თეატრის წითელ დარბაზში გაიმართება.

ზურაბ სოტკილავას საბურთალოს სასაფლაოზე 23 სექტემბერს დაკრძალავენ.