24 წელი სოხუმში, ბაბუშერას აეროპორტში დატრიალებული ტრაგედიიდან. 1993 წლის 22 სექტემბერს, საღამოს 6-ის ნახევარზე, თბილისიდან ალყაში მოქცეულ სოხუმში დაშვების უფლების გარეშე გაფრენილი „ტუ 154“, რომლის ბორტზეც სამხედრო პოლიციის თანამშრომლები, სპეცდანიშნულების რაზმის წევრები, გვარდიის მებრძოლები, მოხალისეები, ექთნები და სამოქალაქო პირები იყვნენ, ბაბუშერას აეროპორტთან, ზღვიდან ნასროლი სითბური რაკეტით ჩამოაგდეს.

საჰაერო ხომალდი ასაფრენ ბილიკზე ნაწილებად დაიშალა და მთლიანად დაიწვა. თვითმფრინავში 132 ადამიანი იყო, რომელთაგან 108 დაიღუპა.

ცხედრები აეროპორტთან ახლოს დაკრძალეს. სამარხი წლების შემდეგ გაიხსნა და დაღუპულების გადმოსვენება ეტაპობრივად განხორციელდა. განწირული რეისის მგზავრები ძმათა სასაფლაოზე არიან დაკრძალულნი, სადაც გადარჩენილები და დაღუპულთა ოჯახის წევრები ყოველ წელს სწორედ ამ დღეს იკრიბებიან.