თბილისში ასეულობით ჰექტარი საწარმოო ტერიტორიაა, რომლის დიდი ნაწილიც დღეს მიტოვებულია. არცთუ შორეულ საბჭოთა წარსულში, საწარმოებს დედაქალაქის ფართობის დაახლოებით 17% ეკავა.
საბჭოთა კავშირის დაშლისა და საქართველოს დამოუკიდებლობის აღდგენის შემდეგ, თბილისში მოქმედმა მსხვილმა ინდუსტრიულმა საწარმოებმა, ფუნქციონირება შეწყვიტეს. მათი ტერიტორიების დიდი ნაწილი ნაკვეთებად დაიშალა და გასხვისდა, შედარებით მცირე ნაწილი კი კვლავ სახელმწიფო საკუთრებაში რჩება.
მტკვრისა და რკინიგზის გასწვრივ განლაგებული ყოფილი საწარმოები, ძირითადად, დედაქალაქის სამ ნაწილში - ავჭალაში, დიდუბესა და სამგორშია კონცენტრირებული. ქალაქის მთელს სიგრძეზე განლაგებული მიტოვებული ან ნახევრად მიტოვებული არეალები თბილისისთვის ამ დრომდე უმნიშვნელოვანეს პრობლემად რჩება.
გამოკვლეული არ არის ტერიტორიების შესაძლო დაბინძურების რისკებიც. ქალაქისთვის მიტოვებული საწარმოების სასარგებლოდ გამოყენების შესაძლებლობაზე პირველად ცოტა ხნის წინ, თბილისის მიწათსარგებლობის გენერალური გეგმის ავტორები ალაპარაკდნენ.
სოფო ზედელაშვილის სიუჟეტი.