საერთაშორისო და ადგილობრივი არასამთავრობო ორგანიზაციების ნაწილი საქართველოს ხელისუფლებისგან აფგან მუხტარლის საქმის სრულყოფილ გამოძიებას, მისთვის და მისი მეუღლისთვის დაზარალებულის სტატუსის მინიჭებას ითხოვს.

ორგანიზაციები “თავისუფლება ახლა” (აშშ), “ადამიანის უფლებების სწავლებისა და მონიტორინგის ცენტრი - EMC” (საქართველო), “საერთაშორისო პარტნიორობა ადამიანის უფლებებისთვის” (ბელგია) ამ წუთებში “სოროსის ფონდში” მართავენ ანგარიშის პრეზენტაციას: “რეპრესიები საზღვრების მიღმა: აზერბაიჯანის დევნილი მოქალაქეები საქართველოში”.

ანგარიშში ასახულია ფაქტები, როცა საქართველოში ჩამოსულ აზერბაიჯანელ დისიდენტებს ემუქრებიან, ავიწროებენ და თავს ესხმიან. ასევე, საუბარია ტენდენციაზე, როცა დისიდენტებს, ხშირ შემთხვევაში, დაუსაბუთებლად ეუბნებიან უარს დევნილის სტატუსისა, თუ ბინადრობის მოწმობის გაცემაზე.

არასამთავრობო ორგანიზაციები წარმოდგენილ ფაქტებზე ხელისუფლებისგან რეაგირებას და სრულყოფილ გამოძიებას მოითხოვენ.

“დროა, საქართველოს მთავრობამ მკვეთრად დააფიქსიროს, რომ ის ადამიანის უფლებებს არ შეწირავს აზერბაიჯანის ავტორიტარულ რეჟიმთან მჭიდრო ურთიერთობების შენარჩუნებას. ბოლო წლების განმავლობაში აზერბაიჯანი ახორციელებს სისტემურ პოლიტიკას კრიტიკული ხმის ჩახშობის კუთხით და ამ დროისთვის 100-ზე მეტი დისიდენტია პატიმრობაში”,-აღნიშნულია არასამთავრობოების ერთობლივ კვლევაში.

კვლევის პრეზენტაცია ერთი კვირის წინ ვარშავაში, ეუთო-ს ვალდებულებათა შესრულების შეფასების ყოველწლიურ შეხვედრაზე გაიმართა. დოკუმენტი საერთაშორისო ორგანიზაციებს, დიპლომატიურ კორპუსს გაეგზავნება.