კონსტიტუციური უსაფრთხოების დეპარტამენტის მეორე მთავარი სამმართველოს ყოფილი უფროსი ლევან ქარდავა მის დაკავებას პოლიტიკურ მოტივს უკავშირებს. 26 მაისის საქმის სასამართლო სხდომაზე ქარდავამ განაცხადა, რომ ექვსი წლის წინ აქციაზე კანონსაწინააღმდეგო არაფერი ჩაუდენია.

ქარდავა ამბობს, რომ მისი საწინააღმდეგო ჩვენებები არ არსებობს.

„მე მინდა ყურადღება გავამახვილო იმაზე, რაც პროკურატურამ თქვა. ჯერ ამბობენ რომ, ხელმძღვანელობდა ლორთქიფანიძე და ახალაია, მერე თითქოს კოორდინირებას ვუწევდით ჩვენ. ამბობენ, 400 მოწმე უნდა დავკიხოთო. არც ერთი ჩემი თანამშრომელი არ იყო ადგილზე. მე სხვას მითითებას ვერ მივცემდი ვინმეს დაკავებაზე ან ცემაზე. არ არსებობს ამ 400 კაცში ისეთი ჩვენება, ვინმე მიუთითებდეს, რომ მე ვინმეს ვავალებდი ვინმეს დაკავებას ან ცემას. არ არსებობს ასეთი მოწმეები. ეს აგებულია პოლიტიკურად მოტივირებულ თემაზე. როცა ასეთ ბრალდებას ამბობენ, ხომ შეიძლება ერთი ჩემი თანამშრომელი მაინც დაეკითხათ. იყო საგანგებო მდგომარეობა და ვიყავი იქ. კანონდარღვევა მე იქ არ ჩამიდენია. არჩევნების წინ გაახსენეს ხალხს 26 მაისი“, - განაცხადა ლევან ქარდავამ.

სასამართლო სხდომაზე შესავალი სიტყვა უკვე წარმოთქვა ბრალდების მხარემ.