თბილისის საერთაშორისო აეროპორტში მოფრენის ახალი ტერმინალი გაიხსნა. ღონისძიებას პრემიერ-მინისტრი გიორგი კვირიკაშვილი, ეკონომიკის მინისტრი გიორგი გახარია, "ტავ ჰოლდინგის“ პრეზიდენტი სანი შენერი, თურქეთის ტრანსპორტის, საზღვაო საქმეთა და კომუნიკაციის მინისტრი აჰმეტ არსლანი ესწრებოდნენ.

პრემიერ-მინისტრმა ქართულ ავიაციასა და თბილისის საერთაშორისო აეროპორტის განვითარებაში შეტანილი წვლილისთვის "ტავ ჯორჯიას" მადლობა გადაუხადა. როგორც "ტავ ჰოლდინგის" პრეზიდენტმა სანი შენერიმ განაცხადა, 2005 წლიდან დღემდე "ტავ"-მა საქართველოში 180 მილიონი დოლარის ინვესტიცია განახორციელა. მისი თქმით, ისინი მიმავალშიც გააგრძელებენ ქართული საავიაციო ბაზრის განვითარებას, ამ სფეროში ინვესტიციების განხორციელებით .

თბილისის საერთაშორისო აეროპორტში მოფრენის ახალი ტერმინალი 12 000 კვ. მეტრის ფართობზეა გაშენებული, რომელსაც აქვს ახალი ჩასხდომის ხიდი ორი გასასვლელით, თვითმფრინავის 5 ახალი სადგომი, F კოდის თვითმფრინავებისთვის გათვლილი, 105 მეტრის სიგრძის ბარგის ე.წ. 5 კარუსელი და 250 მანქანაზე გათვლილი ახალი ავტოსადგომი.

თბილისის საერთაშორისო აეროპორტს ჯამში ჩასხდომის 5 ხიდი და 6 bus gate აქვს. თბილისის საერთაშორისო აეროპორტის ორივე ტერმინალი წელიწადში 40 00 000 მგზავრს მოემსახურება.

მოფრენის ახალი ტერმინალი კომპანია "ტავ ჯორჯიამ ააშენა", რისთვისაც 33 მილიონი აშშ დოლარის ინვესტიცია განხორციელდა. სამშენებლო სამუშაოები 2016 წლის 27 ივნისს დაიწყო. პირველი მგზავრები ახალი მოფრენის ტერნიმალში 2017 წლის 12 ივლისს მიიღეს.

ტერმინალის მშენებლობაზე ამჟამად 500 ადამიანი იყო დასაქმებული.