ვაშინგტონში, კაპიტოლიუმის შენობაში პოლიციამ ათობით დემონსტრანტი დააკავა. დემონსტრაცია აშშ-ის სენატის ფინანსთა კომიტეტის სხდომათა დარბაზში და დერეფნებში გაიმართა. აქციის მონაწილეები ქვეყნის სამედიცინო დაზღვევის სისტემის რეფორმირებას აპროტესტებდნენ.
სენატში განიხილებოდა ჯანდაცვის შესახებ კანონპროექტი, რომელმაც ამჟამად მოქმედი “ობამაქეარის” სახელით ცნობილი კანონი უნდა ჩაანაცვლოს.
დემონსტრანტები კომიტეტის სხდომაზე ეტლებით მივიდნენ. ზოგიერთმა მათგანმა კი ბავშვებიც მიიყვანა.
რესპუბლიკელები “ობამაქეარს” შვიდი წლის განმავლობაში აკრიტიკებენ. კანონის მოწინააღმდეგეები მიიჩნევენ, რომ ჯანმრთელობის დაზღვევის პროგრამა ზედმეტად ძვირი უჯდება ბიუჯეტს. ბარაკ ობამას მიერ ინიცირებული კანონის გაუქმება დონალდ ტრამპის ერთ-ერთი მთავარი წინასაარჩევნო დაპირება იყო.
რესპუბლიკელები ამჟამად 100-ადგილიან სენატში 52 მანდატს ფლობენ, თუმცა სამი მათგანი, მათ შორის ჯონ მაკკეინი, “ობამაქეარის” გაუქმების წინააღმდეგ გამოდის.
2010 წელს მიღებული ხელმისაწვდომი ჯანდაცვის პროგრამა 20 მილიონ ამერიკელზე ვრცელდება.