სირიის იდლიბის პროვინციაში ავიადარტყმას 37 ადამიანი ემსხვერპლა. დაღუპულთა შორის 12 ბავშვია.
როგორც თურქეთის საგარეო საქმეთა სამინისტრო და სირიელი უფლებადამცველები აცხადებენ, საჰაერო დარტყმა რუსულმა ავიაციამ 22 სექტემბერს განახორციელა.
რუსულმა თვითმფრინავებმა ავიაიერიში იდლიბის ჩრდილო-დასავლეთ ნაწილში მიიტანეს, რომელსაც ძირითადად ჯიჰადისტები და სირიელი ოპოზიციონერები აკონტროლებენ.
როგორც თურქეთის საგარეო საქმეთა მინისტრმა მევლუთ ჩავუშოღლუმ განაცხადა, იდლიბში განხორციელებული საჰაერო დარტყმა განხილული იქნება ვლადიმერ პუტინისა და რეჯეპ ტაიპ ერდოღანის შეხვედრაზე, რომელიც სექტემბრის ბოლოს არის დაგეგმილი.
სირიის ადამიანის უფლებათა მონიტორინგის ცენტრის ინფორმაციით, ავიაიერიში მაისში ცეცხლის შეწყვეტის შეთანხმების ამოქმედების შემდეგ აღნიშნულ რეგიონში ყველაზე ძლიერი იყო.
რუსეთის თავდაცვის სამინისტრო იდლიბში სამოქალაქო ობიექტების დაბომბვას უარყოფს. უწყებაში აცხადებენ, რომ ავიადარტყმები ტერორისტების პოზიციებზე განხორციელდა.