აშშ-ს ჩრდილოეთ კორეისთვის ომი არ გამოუცხადებია, მსგავსი გამონათქვამები აბსურდულია,- ამის შესახებ თეთრი სახლის პრესმდივანმა სარა სანდერსმა ბრიფინგზე განაცხადა.

„ჩვენ არ გამოგვიცხადებია ჩრდილოეთ კორეისთვის ომი. სიმართლე გითხრათ, მსგავსი განცხადება აბსურდულია“, - აღნიშნა თეთრი სახლის წარმომადგენელმა.

მისი თქმით, აშშ-ი ჩრდილოეთ კორეის მთავრობის შეცვლისკენ არ ისწრაფვის, არამედ კორეის ნახევარკუნძულის მშვიდობიან დენუკლეარიზაციისკენ მიმართავს ზომებს, რომელთა შორის ფხენიანზე მაქსიმალური ეკონომიკური და დიპლომატიური ზეწოლაა.
დღეს ჩრდილოეთ კორეის საგარეო საქმეთა მინისტრმა დონალდ ტრამპის განცხადება ფხენიანისთვის ომის გამოცხადებად შეაფასა. მისი თქმით, ჩრდილოეთ კორეას აქვს სრული უფლება, ჩამოაგდოს ამერიკული ბომბდამშენები.
გაერო-ს გენერალურ ასამბლეაზე გამოსვლისას ჩრდილოეთ კორეის საგარეო საქმეთა მინისტრმა აშშ-ის პრეზიდენტს „ფსიქიკური პრობლემების მქონე, განდიდების მანიით შეპყრობილი ადამიანი“ უწოდა, რომელსაც ბირთვული იარაღი არ უნდა ანდო.
მანამდე, აშშ-ის პრეზიდენტი გაერო-ს ტრიბუნიდან ჩრდილოეთ კორეას განადგურებით დაემუქრა.
23 სექტემბერს კი ამერიკის შეერთებული შტატების ბომბდამშენმა B-1B Lancer-მა F-15 ტიპის ორი ავიაგამანადგურებლის თანხლებით ჩრდილოეთ კორეის სანაპიროს დემილიტარიზებულ ზონასთან გადაუფრინა.