საპარლამენტო უმრავლესობა პრეზიდენტის პასუხს ელის. ქართული ოცნება გიორგი მარგველაშვილს სთხოვს, გუშინ დამტკიცებულ საკონსტიტუციო ცვლილებების პროექტზე ვეტო გამოიყენოს, თუმცა მხოლოდ ორ საკითხზე. იგულისხმება ე.წ. ბონუსების და საარჩევნო ბლოკების თემა, რაზეც მმართველი პარტია დათმობაზე წავიდა.

თუ პრეზიდენტი თხოვნას შეასრულებს, მაშინ საპარლამენტო უმრავლესობას ზემოთ ნახსენებ ორ საკითხზე ახალი კანონპროექტის ინიცირება აღარ მოუწევს. ეს კი იმას ნიშნავს, რომ ბონუსების სისტემის აკრძალვა და ერთჯერადად საარჩევნო ბლოკების შენარჩუნება საკონსტიტუციო რეფორმაში ახლავე აისახება.

გიორგი მარგველაშვილი შეთავაზების განსახილველად ფართო კონსულტაციებს გეგმავს, თუმცა კონსულტაციების ფორმატიც სადავო ხდება.