უკრაინის ვინიცის ოლქის ქალაქ კალინოვკაში მდებარე სამხედრო საწყობში ხანძარი სავარაუდოდ უპილოტო საფრენმა აპარატმა გამოიწვია, ამის შესახებ უკრაინის პრეზიდენტის მრჩეველმა იური ბირიუკოვმა სოციალურ ქსელ „ფეისბუქში“ დაწერა.
„საგუშაგოზე მდგარმა ერთ-ერთმა სამხედრომ უცნაური ხმის შესახებ აცნობა ხელმძღვანელობას. რამდენიმე წამში ღია მოედანზე აფეთქებები დაიწყო. პერიმეტრი საიმედოდ იყო დაცული, ამიტომ როგორც ჩანს, ეს უპილოტო საფრენი აპარატი იყო. უკრაინის უსაფრთხოების სამსახურმა მისი დაჭერაც სცადა. არაოფიციალური ინფორმაციით, წინა დღით ვიღაც დაუკავებიათ კიდეც“, - წერს პოროშენკოს მრჩეველი.
ამასთან, ბირიუკოვის მონაცემებით, ხანძრის შედეგად განადგურდა მხოლოდ ღია საწყობები, მიწისქვეშა საცავები, ბეტონისა და აგურის ანგარები კი არ დაზიანებულა.
ხანძრის სალიკვიდაციო სამუშაოებისთვის ხელისფულებამ სამი მილიონი დოლარი გამოყო.
კალინოვკაში მდებარე სამხედრო საწყობში ხანძარი ადგილობრივი დროით დაახლოებით 22.00 საათზე გაჩნდა, რასაც აფეთქებები მოჰყვა. ამჟამად აფეთქებები ინტენსივობა შედარებით შემცირდა. მიმდებარე რაიონებიდან ადგილობრივების ევაკუაცია გრძელდება. სწყობიდან ხუთი კილომეტრის რადიუსიდან ევაკუირებულია უკვე 30 ათასამდე ადამიანი. წინასწარი მონაცემებით, დაშავებულია ორი ქალი. სამხედრო პროკურატურამ მომხდარი დივერსიად შეაფასა.