ამერიკის შეერთებული შტატებისა და მექსიკის საზღვარზე კედლის მშენებლობა დაწყებულია. პირველი რკინის კონსტრუქცია კალიფორნიის შტატის სამხრეთით, ქალაქ სან-დიეგოს გარეუბანში აღმართეს. აღნიშნულ ტერიტორიაზე აშშ-ს მექსიკის ტიხუანას რეგიონი ესაზღვრება.
ამერიკის შეერთებული შტატების საზღვრის დაცვის დეპარტამენტში განაცხადეს, რომ კალიფორნიის სამხრეთით რკინის რვა ბლოკი უკვე დამონტაჟებულია. როგორც დეპარტამენტში განმარტავენ, კედელი რკინისა და ბეტონისგან აშენებული კონსტრუქცია იქნება, რომლის სიმაღლე 9 მეტრს შეადგენს.
კალიფორნია-მექსიკის საზღარზე კედლის მშენებლობა 30 დღეში დასრულდება. თითოეული კედლის მშენებლობისთვის ბიუჯეტიდან 450 ათასი დოლარი გამოიყო. არალეგალი მიგრანტების ნაკადის შესაჩერებლად მექსიკისა და ამერიკის შეერთებული შტატების საზღვარზე კედლის აშენება დონალდ ტრამპის ერთ-ერთი მთავარი წინასაარჩევნო დაპირება იყო.