მმართველ გუნდში საქართველოს პრემიერ-მინისტრის და გერმანიის კანცლერის შეხვედრას ორი ქვეყნის ურთიერთობის პროცესში მნიშვნელოვან მოვლენად აფასებენ.
უმრავლესობის წევრების განცხადებით, გერმანია საქართველოს სტრატეგიული პარტნიორია და ამ ვიზიტმა კიდევ ერთხელ დაადასტურა, რომ გერმანია მტკიცედ უჭერს მხარს საქართველოს ევროპულ მისწრაფებებს. საქართველოს პრემიერ-მინისტრი ანგელა მერკელს გუშინ შეხვდა.
გიორგი კვირიკაშვილმა მერკელს საპარლამენტო არჩევნებში მისი პოლიტიკური გუნდის გამარჯვება მიულოცა. შეხვედრის დროს ყურადღება გამახვილდა პოლიტიკურ და ეკონომიკურ სფეროში საქართველო-გერმანიის თანამშრომლობის საკითხზე.
გერმანია არამარტო აღმოსავლეთ პარტნიორობის სამიტზე, არამედ სხვა სფეროებშიც გვიჭერს მხარს, - ამის შესახებ გერმანიაში საქართველოს საგანგებო და სრულუფლებიანმა ელჩმა ლადო ჭანტურიამ განაცხადა. მისი თქმით, გერმანიის კანცლერთან შეხვედრა ძალიან კონსტრუქციული იყო და მერკელი საქართველოს მიმართ დადებით დამოკიდებულებას არ მალავდა.