სამების საკათედრო ტაძარში პატრიარქმა მრევლთან და სამღვდელოების წარმომადგენლებთან პირველი შეხვედრა გამართა. შეხვედრაზე საუბარი შეეხო ქვეყნის წინაშე მდგარ პრობლემებსა და მათი გადაჭრის გზების ძიებას. პატრიარქმა საუბრის დასაწყისში ყურადღება გაამახვილა საქართველოს საკუთრებაში არსებული მიწისა და წყლის მნიშვნელობაზე და მისი ქვეყნისთვის სასარგებლოდ გამოყენების აუცილებლობაზე.
ასევე, ქვეყნის წინაშე მდგარ მთავარ გამოწვევებად დასახელდა ტერიტორიული მთლიანობა და სამუშაო ადგილების შექმნა. უწმინდესმა აღნიშნული საკითხების შესახებ დამსწრე საზოგადების აზრი მოისმინა. მათმა უმრავლესობამ მიწის გასხვისების ნაკლოვანების შესახებ ისაუბრა, ასევე გამოითქვა აზრი ქვეყნაში გაჭირვების დასაძლევად სხვადასხვა სამეურნეო პროექტების განხორციელების შესახებ.
პატრიარქმა ამ იდეის მხარდასაჭერად, სამუშაო ჯგუფის შექმნის ინიციატივაც გამოთქვა. ამ დრომდე ცნობილი იყო, რომ მსგავსი შეხვედრა პატრიარქთან ყოველ ხუთშაბათს გაიმართებოდა, თუმცა იმ მიზეზით, რომ ხუთშაბათი სამუშაო დღეა, მომავალი კვირიდან შეხვედრები შაბათობით გაიმართება.