საერთაშორისო სტანდარტებით აღჭურვილი კვლევითი ლაბორატორია SMART AtmoSim-ი სახელმწიფო უნივერსიტეტის მე-2 კორპუსში, ოფიციალურად დღეს გაიხსნა. ლაბორატორიაში ატმოსფეროს ქიმიური ანალიზი გამოიკვლევა და ამის საფუძველზე ატმოსფეროს მდგომარეობის მათემატიკურ მოდელს შექმნიან. ადგილზე გამოიკვლევენ ჰაერის ხარისხს, მოხდება ატმოსფეროს დეტალური ანალიზი.

დღესვე გაფორმდა მემორანდუმი თსუ-ს, ქალაქის მერიასა და გარემოს ეროვნულ სააგენტოს შორის.

ლაბორატორიის გახსნაზე დღეს გერმანიის წარმომადგენლობასთან ერთად, განათლების მინისტრი და ქალაქის მერი იმყოფებოდნენ.

„ესაა უკვე მეორე ასეთი smart lab-ი, ჭკვიანი ლაბორატორია,რომლის კონცეფციაც არის ძალიან საინტერესო. ეს ოთახი გახდა, ფაქტიურად, გაგრძელება იულიხის ლაბორატორიის, რომელიც გაცილებით მასშტაბურია. ანუ იმ ლაბორატორიას შეუძლია აქაური მონაცემები მიიღოს ამ მოწყობილობების მეშვეობით. აქაურ სტუდენდებს და მკვლევარებს აქვთ საშუალება, რომ ჩართული იყონ იულიხის ლაბორატორიის მუშაობაში“, - აღნიშნა განათლების მინისტრმა,ალექსანდრე ჯეჯელავამ.

ატმოსფერული კვლევების ლაბორატორია იულიხის კვლევითი ცენტრის ჩართულობით გაიხსნა და იგი გერმანიაში მდებარე იულიხის ლაბორატორიის ზუსტი ანალოგი იქნება. კვლევებში თსუ-ს სამეცნიერო ფაკულტეტის სტუდენტები ჩაერთვებიან.