„დემოკრატიული მოძრაობა - თავისუფალი საქართველოს“ ლიდერებმა საარჩევნო პროგრამა წარადგინეს. დიმიტრი ლორთქიფანიძისა და კახა კუკავას მიერ წარმოდგენილ პროგრამულ პრიორიტეტებში ადგილობრივი ბიუჯეტიდან პრემიებისა და დანამატების, აგრეთვე კონცერტებისა და ვერტიკალური ბაღებისთვის გათვალისწინებული ხარჯის ამოღება მოხვდა.

კანდიდატები სოციალურად დაუცველ მოსახლეობას პრობლემების გადაჭრას ჰპირდებიან, მათ შორის არის გამოსახლების, უფასო სასადილოების, სოციალური სახლებისა და მედიკამენტების პრობლემები.

„დემოკრატიული მოძრაობა - თავისუფალი საქართველოს“ საარჩევნო პროგრამაში წერია, რომ პარტია „სითი პარკთან“ გაფორმებულ ხელშეკრულებასაც გააუქმებს. ამასთან, კახა კუკავა მიიჩნევს, რომ თბილისში ახალი საცხოვრებელი კომპლექსების მშენებლობა უნდა შეწყდეს, შეჩერდეს არაბული და თურქული კვარტლების მოწყობა ბათუმსა და თბილისში, სადაც პარტიის გამარჯვების შემთხვევაში, ამუშავდება საიმიგრაციო სამსახური უკანონო მიგრანტებისთვის. გარდა ამისა, მიმართავენ პარლამენტს, რომ საჯარო ადგილებში ჩადრისა და ნიქაბის ტარება აიკრძალოს.

„თბილისის ცენტრში არაბული და თურქული კვარტლების მშენებლობა ინტენსიური ტემპებით მიმდინარეობს, რაც ჩვენთვის აბსოლუტურად მიუღებელია, ამიტომაც თბილისის მერია, აგრეთვე თუ გავიმარჯვებთ ბათუმის თვითმმართველობაში, ბათუმის მერიაც, იზრუნებს იმაზე, რომ მოხდეს ყველა უკანონო მიგრანტის დეპორტაცია და ჩვენ არ მივიღოთ თბილისის ცენტრში იგივე სურათი, რაზეც დღეს ძალიან ბევრს ნანობენ, ძალიან ბევრი ევროპული ქალაქის მესვეურები“, - აღნიშნა თბილისის მერობის კანდიდატმა კახა კუკავამ.

პარტიაში მიიჩნევენ, რომ მათ მიერ წარმოდგენილი პროგრამის განხორციელება შესაძლებელია, რადგან არ არის პოპულისტური.

„ყველა პუნქტი, რომელიც ჩვენ გვაქვს ამ პროგრამაში, არის ძალიან რეალისტური, არც ერთი არ არის პოპულისტური, ყველას შესრულება შეიძლება იმ შემთხვევაში, რა თქმა უნდა, თუ ჩვენ მოსახლეობის სერიოზული მხარდაჭერა გვექნება. დარწმუნებული ვარ და ვიცი, რომ ასეთი მხარდაჭერა ჩვენ გვაქვს, თუმცა არის ერთი მნიშვნელოვანი მომენტი, ხელისუფლება ყველანაირად ცდილობს და შეეცდება, რომ არჩევნების მანიპულაცია მოახდინოს“, - აღნიშნავს „დემოკრატიული მოძრაობის" ლიდერი ნინო ბურჯანაძე.