რამდენიმე საათის განმავლობაში ვითარება დაძაბული იყო ახალქალაქში, სოფელ კუმურდოში, სადაც ერთმანეთს ადგილობრივების ნაწილი და პოლიცია დაუპირისპირდა.
ინციდენტი მეათე საუკუნის ტაძრის ეზოში მოხდა, რომლის რესტავრაციასაც ადგილობრივების ერთი ნაწილი ეწინააღმდეგება. დღეს მათ ტაძრის ეზოში შეჭრა სცადეს, თუმცა ამის საშუალება დაცვის პოლიციის თანამშრომლებმა არ მისცეს, რომლებიც ტერიტორიას იცავენ.
ქართული ტაძარი კულტურული მემკვიდრეობის ძეგლის სტატუსს ატარებს და მისი რესტავრაცია 2016 წელს დაიწყო.
ჩხუბი და ფიზიკური დაპირისპირება კუმურდოში მას შემდეგ დაიწყო, რაც დაცვის პოლიციამ ადგილობრივების ნაწილს ტაძრის ეზოში შესვლის და ქვაჯვრების აღმართვის ნებართვა არ მისცა. სიტუაციის განსამუხტად, დაცვის პოლიციამ საპატრულო პოლიცია გამოიძახა.
სამართალდამცველების ადგილზე მისვლის შემდეგ ტაძართან შეკრებილებმა მათ ქვები ესროლეს. ადგილზე სპეცრაზმიც მივიდა. ინციდენტის შედეგად დაშავებულია რამდენიმე პირი, მათ შორის სამართალდამცველები, დაზიანებულია მანქანებიც.
სოფელ კუმურდოში ვითარება შინაგან საქმეთა მინისტრის ჩასვლის შემდეგ განიმუხტა. გიორგი მღებრიშვილი ადგილობრივებს შეხვდა და ესაუბრა. დაპირისპირების დროს პოლიციამ ორი ადგილობრივი გამოკითხვაზე გადაიყვანა. ამ დროისთვის მათი გამოკითხვა დასრულებულია.